കൈപ്പാണല്ലോ!

രാവിലെ എപ്പോഴും നല്ല തിരക്കാണ്. അപ്പത്തിന്റെ മാവ് ബാക്കി ഫ്രിഡ്ജിൽ ഉണ്ട്. രാവിലെ അതിന്റെ തണുപ്പ് മാറാൻ ഫ്രിഡ്ജിൽ നിന്ന് പുറത്തെടുത്തു വച്ചു. ചായയിട്ടു. അതിനിടയ്ക്ക് അരി അടുപ്പിൽ വെച്ചു.

ഇടയ്ക്ക് ചില വാക്കുകൾ തലയിൽ നിന്നും പുറത്തേക്ക് ചാടാൻ വെമ്പൽ കൊണ്ടിരിക്കുന്നതിനാൽ ബുക്കിന്റെയും പേനയുടെയും അടുത്തേക്ക് ഓടി. ഇല്ലെങ്കിൽ തലയിൽ നിന്നും ചാടി അപ്പുറത്തെ അയ്യത്തേക്ക്  ( പറമ്പ് ) പോയാലോ? അതിനാൽ അവരെ ഭദ്രമായി ബുക്കിനുള്ളിൽ ആക്കിയിട്ട് വീണ്ടും അടുക്കളയിലേക്ക് ചെറിയൊരു ഓട്ടം.

മാവിന്റെ തണുപ്പ് മാറി. എന്നാലിനി അപ്പം ഉണ്ടാക്കാം. രണ്ടപ്പം ഉണ്ടാക്കി. ഉപ്പ് കറക്റ്റ് ആണോ എന്നറിയാൻ കുറച്ച് എടുത്തു കഴിച്ചു നോക്കി. "അയ്യേ....  എന്തൊരു കൈപ്പ്.! ഇന്ന് ഈ മാവിന് എന്തു പറ്റി?!

ഇന്നലെ അപ്പം ഉണ്ടാക്കിയതിന്റെ ബാക്കി അപ്പോൾ തന്നെ ഫ്രിഡ്ജിൽ വച്ചിരുന്നതാണല്ലോ. പിന്നെ എന്തുപറ്റി!? ഇനിയിപ്പോൾ ഈ മാവ് എന്ത് ചെയ്യും? മാവ് വെറുതെ കളയണ്ട. ചെറുതായിട്ടൊന്നു വേവിച്ചിട്ട് കാക്കയ്ക്ക് കൊടുക്കാം.

അതിനിടയിൽ അവിടെ വന്ന അമ്മ എന്റെ പ്രകടനം കണ്ട് കുറച്ച് അപ്പം എടുത്ത് കഴിച്ചു നോക്കി. "വേണ്ടമ്മേ... ഭയങ്കര കൈപ്പാണ്. എന്തോ കുഴപ്പമുണ്ട്."

" എവിടെ കൈപ്പെന്നാ? ഒരു കുഴപ്പവുമില്ല."

ഇത് കേട്ട് വീട്ടിലെ ഫുഡ് ഇൻസ്പെക്ടർ ആയ എന്റെ മോനും വന്നു.  അവനും എടുത്തു കഴിച്ചു നോക്കി.

" ഇതിനൊരു കുഴപ്പവുമില്ല. അമ്മയ്ക്ക് തോന്നിയതാ."

" അതെന്താ എനിക്ക് മാത്രം അങ്ങനെ തോന്നാൻ?! ങ്ങേ...! എന്റെ വായിലെ കൈപ്പാണോ? അപ്പോൾ പനി വരാനുള്ള ലക്ഷണം ആണല്ലോ? "

വീണ്ടും ഞാൻ അപ്പത്തിനെ നോക്കി.

അപ്പം : "തൊട്ടു പോകരുത്. നിനക്ക് സുഖമില്ലാത്തതിന് എന്നെ കുറ്റം പറയുന്നോ? അവനവന്റെ കുറ്റം മറച്ചു വെച്ചിട്ട് മറ്റുള്ളവരെ കുറ്റം പറഞ്ഞാൽ ഉണ്ടല്ലോ?!"

✍️ഷൈനി