ആത്മാവ്

ഞാൻ എഴുതിയ  'ആത്മാവ്' എന്ന  ഹൈക്കു വായിച്ചിട്ട് പലർക്കും അതിന്റെ ശരിയായ അർത്ഥം അല്ലെങ്കിൽ ഞാൻ എന്താണോ ഉദ്ദേശിച്ചത് അത് മനസ്സിലായിട്ടില്ല.

 ഒരു ആത്മാവ് ഒരു എഴുത്തുകാരനോട് പറയുന്നതായിട്ടാണ് ഹൈക്കുവിൽ. എന്റെ കാഴ്ചപ്പാടിൽ മനുഷ്യർക്ക് മാത്രമല്ല സകല ജീവജാലങ്ങളിലും ഉണ്ട് ആത്മാവ്. കാടിന്, പുഴയ്ക്ക്, വായുവിന് അങ്ങനെ കാണുന്ന എന്തിലും ഞാൻ കാണുന്നു ആത്മാവിനെ.

ഒരുദാഹരണം പറഞ്ഞാൽ, കൂട്ടിലുള്ള ഒരു പക്ഷിയെ കാണുമ്പോൾ നമുക്ക് അതിനെ മനോഹരമായി ശബ്ദിക്കുന്ന കാണാൻ ഭംഗിയേറിയ ഒരു പക്ഷി മാത്രം. ഭക്ഷണവും വെള്ളവും എല്ലാം അതിന് കിട്ടുന്നുണ്ട്.

 പക്ഷേ ഈ ഭൂമിയിൽ യഥേഷ്ടം  പറന്നു നടക്കാനുള്ള അതിന്റെ അവകാശത്തെ, അതിന്റെ സ്വപ്നത്തെ എല്ലാം ഇല്ലാതാക്കിയാണ് ആ പക്ഷി ആ കൂട്ടിൽ കിടക്കുന്നത്. അതിനെതിരെ ആ പക്ഷിക്ക് ഒന്നും ചെയ്യാൻ കഴിയുന്നില്ല. ആ സ്വർണ്ണക്കൂട്ടിൽ  ആ കിളി ചത്തതിന് തുല്യമല്ലേ കിടക്കുന്നത്.!?

 കാട്ടിൽ നിന്നും നാട്ടിലേക്ക് പറിച്ചുനട്ട കരിവീരൻ പല ഉത്സവങ്ങൾ പോലുള്ള ആഘോഷങ്ങളിൽ ഗത്യന്തരമില്ലാതെ നിശബ്ദനായി ആടയാഭരണങ്ങൾ അണിഞ്ഞ് അസഹ്യമായ ശബ്ദത്തിന്റെയും പ്രകാശത്തിന്റെയും നടുക്ക് മണിക്കൂറോളം നിൽക്കുന്നു. സഹികെട്ട് അതിൽ ചിലരുടെ ആത്മാക്കൾ പ്രതികരിക്കും. വിചാരിക്കാതെ അവർ കൊലയാളികളായി മാറും. അവർക്കിടയിൽ പ്രതികരിക്കാത്ത മറ്റു ആത്മാക്കളുടെ ആത്മഹത്യ പലവട്ടം കഴിയും.

 മനുഷ്യരിലേക്ക് വന്നാൽ... ഒരു കാരണവും കൂടാതെ ഒരു സമൂഹത്തിൽ ഒരാൾ ഒറ്റപ്പെട്ടാൽ, ഇല്ലാത്ത കാരണം പറഞ്ഞ് അയാളെ അപമാനിച്ചാൽ, അതിനെതിരെ ഒന്ന് ശബ്ദമുയർത്താൻ പോലും ശക്തിയില്ലാതെ  ഗതികെട്ട് അയാൾക്ക് നിൽക്കേണ്ടി വന്നാൽ... അയാളെ  ജീവനോടെയുള്ള ആത്മാവില്ലാത്ത ഒരു ശരീരമായിട്ട് എനിക്ക് തോന്നും. അങ്ങനെ ജീവിതത്തിൽ പ്രതികരണശേഷി നഷ്ടപ്പെട്ട ഒരുപാട് ജന്മങ്ങൾ എനിക്ക് ചുറ്റിനും ഞാൻ കാണുന്നു.

 അങ്ങനെയുള്ള ആത്മാക്കൾക്ക് വേണ്ടി ആരെങ്കിലും അവർക്ക് അനുകൂലമായി ഒന്ന് ശബ്ദിച്ചാൽ അത് അവർക്ക് കിട്ടുന്ന ഒരു ആശ്വാസമാണ്.

 ആത്മാവ് (ഹൈക്കു)

 "എന്നാത്മഹത്യ

 നീട്ടിവെയ്ക്കുന്നല്ലോ നിൻ

 തൂലികയിപ്പോൾ"

✍️ഷൈനി